十二生肖 老鼠第一

【文／何石松】

 

　　十二生肖有幾下種唸法，有人唸：鼠牛虎兔，龍蛇馬羊，猴雞狗豬；也有人做一下斯念忒：鼠牛虎兔龍蛇馬羊猴雞狗豬。記得細細時節，𠊎係恁樣唸介：一鼠二牛三虎四兔五龍六蛇七馬八羊九猴十雞十一狗十二豬。恁樣唸，毋單淨可以認字記數，還能摎第幾生肖記到當清楚。不管仰般唸，老鼠一定係第一隻愛唸介，所以講：十二生肖，老鼠第一。

　　一般來講，大家對老鼠都無好印象，認為佢係偷食貪心，無廉恥無道德介壞東西。兩千零年前，人就當惱老鼠咧！你看，《詩經》講介：「你看該老鼠有皮，人也有皮，人有皮，能夠做恁大介官，還像老鼠在該穀倉肚偷食，恁樣介人，毋早早去死，愛做麼介？」罵人去死，有幾下千年介歷史咧，可見，人係仰般惱老鼠啊！

　　恁得人惱介老鼠，還排十二生肖第一名，實在真奇怪，一定有原因。老鼠，能夠在十二生肖肚打第一，有下背幾下種介講法：

　　第一種係：「貓鼠結冤」說。聽講上早以前，玉皇大帝愛選十二種動物來輪值一年一年介生肖，分人類來做學習介模範，所有介動物都當想愛試試仔。該當時，貓仔摎老鼠還係好朋友，老鼠斯湊貓仔，韶早共下去參加比賽，兩儕相約好，先醒儕愛喊對方䟘床。老鼠使梟，醒咧以後無喊貓仔，自家先去咧。佢看著牛行最頭前，就跳到牛背囊頂，等會到時節，老鼠一躍，就到牛面前，結果老鼠就打第一。老鼠當歡喜介轉來摎貓仔講，貓仔當閼，想愛一下摎佢食忒，老鼠驚到尾瀉屎走忒。從此以後，老鼠一看著貓仔，就煞煞囥起來，兩儕介冤仇結到這下，還吂解決。老鼠得著第一名，嗄失忒一個朋友，難怪人講：千年介老鼠冤啊！

　　第二就係：「牛鼠競爭」說。玉皇大帝本來決定十二生肖第一名係牛，無想著一條老鼠突然擠等來，跳到牛面前，講佢正係第一名。玉皇大帝認為老鼠恁細，仰會第一？老鼠就拗講：「麼儕講𠊎細，毋信，來去街路行行仔，看百姓講麼儕較大？」正經唷，老鼠斯坐在牛背囊頂去遶街，結果，滿街路介人斯講：「哇！你看，該恁大介老鼠！」無人講該牛恁大，好啦，玉皇大帝就分老鼠第一。

　　第三就係：「鼠救黃帝」說。聽講上古時代，黃帝摎蚩尤爭天下，蚩尤用計，送一對裡背張有炸藥介蠟燭分黃帝做等路，放在倉庫肚。該暗晡，老鼠趖到倉庫，該食這食，該囓這咬，恁堵好囓著蠟燭，蠟燭無味緒，試著無意無思，就睡忒咧。

　　第二日，係黃帝召開大會，愛決定十二生肖介日仔。派人去拿蠟燭點火，正發現蠟燭分老鼠囓過，看著裡背有炸藥，正知，這係愛害黃帝介。係講無注意，一點火斯爆炸，該黃帝就無命咧！本來老鼠毋係第一名介，這下因為咬蠟燭，救了黃帝一條命，所以，十二生肖摎老鼠排第一。老鼠救駕有功，封為子神。

　　第四係：「子鼠開天」說。聽講頭擺天地吂分開介時節，斯像一團夭夭糊糊，軟毋軟，硬毋硬，暗摸胥疏，行毋通，看毋著，茫茫渺渺，天地不分，擘毋開介糊共樣。好得老鼠恁聰明，用佢介牙齒咬出一隻大空，在萬古長夜天烏地暗之中，正有一陣光線瞠落來，慢慢看得著。所以，明朝介李長卿在《松霞館贅言》這本書講：「子神鼠破混玄，天開；从警，戒身以平安；从捷，迅足以登先，應萬物之靈，吐物華天寶之獸。」就係講天係老鼠打通介，安到子鼠開天，全靠佢介聰明、驚心，反應當遽，所以能拿第一合保平安，正經係「身仔細細等聰明，手腳當煞通天庭；天烏地暗佢能破，十二生肖第一靈。」

　　恁堵好，十天干，愛摎十二生肖對應，該就用老鼠來對子時好啦！所以講：頭擺天地初分時，天開于子，十二生肖，從老鼠開始，該就係子鼠、丑牛、寅虎、卯兔、辰龍、巳蛇、午馬、未羊、申猴、酉雞、戌狗、亥豬。你看，子鼠對應，佢又係第一。

　　子就係嬰兒，本來係無介，突然變有；原來無子，突然有子，斯像吂開天，這下有天咧，該就係一種創新，一種新介生命，天地萬物從子開始，也係從老鼠開始。係無老鼠開天，哪來介天？可見，十二生肖，還係老鼠打第一。

　　第五就係：「百子千孫」說。上早時代，人力缺乏，愛對付天頂介惡禽大鳥，地上介毒蛇猛獸，還有蜈蚣蟲，惡蟲等，講毋盡介邪神魔鬼，愛當多介人正做得對付外在環境。所以，愛越多人越好。頭擺醫學無恁發達，細人仔降出來，無一定畜得生。愛鼓勵生育，十二生肖肚，麼儕等會降呢？就係老鼠。老鼠出世三隻月，就會降子咧，一年可以降10胎，1胎降20條老鼠子，一條老鼠嫲，一年可以降200條，係講加上佢介子子孫孫，一年至少可降兩三千條，比起牛馬一年正降一條，老鼠係一等會降介。正經係百子千孫，可以傳到千代萬代。難怪，在新婚祝詞時，輒常聽人講「兩姓合婚，百子千孫」，百子千孫介師傅，就係老鼠！

　　所以講：「十二生肖，老鼠第一！」

　　※此處的「介」為大眾通用的「的」，同教育部訂的「个」之意
　　
何石松 聲檔 —十二生肖 老鼠第一（海陸腔）





　

▲BACK